ദാരിദ്ര്യം

ദാരിദ്യം എന്നാൽ

ഇന്ത്യയിലെ ആദിവാസികൾക്കിടയിൽ 30 കൊല്ലത്തോളം ജീവിച്ച വെറിയർ എൽവിൻ എന്ന
ബ്രിട്ടീഷുകാരൻ ബോംബയിലെ റോട്ടറിക്ലബ്ബിൽ
വർഷങ്ങൾക്ക് മുൻപ് നടത്തിയ പ്രസംഗമാണിത്..

"ദാരിദ്ര്യം നമുക്ക് ചുറ്റും ഉള്ളതുകൊണ്ട്
അതെന്താണെന്ന് നമ്മൾ മറന്നു പോകുന്നു...
ഒരു ദിവസം ഒരു ആദിവാസി കുടുംബം കണ്ണീരോടെ എന്റെ അടുത്ത് വന്നു. അവരുടെ കുടിൽ തീപിടുത്തത്തിൽ നശിച്ചു വെണ്ണീരായി. വീടുണ്ടാകാൻ എത്ര പൈസ വേണ്ടി വരുമെന്ന്
ഞാൻ അവരോടു ചോദിച്ചു..

"നാല് രൂപ "
അവർ മറുപടി പറഞ്ഞു.

നാല് രൂപ...  അൽഡസ് ഹക്സിയുടെ 'ബ്രേവ് ന്യൂ വേൾഡ് ' നോവലിന്റെ ഒരു കോപ്പിയുടെ വില.
അതാണ് ദാരിദ്ര്യം..

ബസ്കറിൽ തൂക്കി കൊല്ലാൻ വിധിക്കപ്പെട്ട മരിയ എന്ന കുറ്റവാളിയോട് അവസാനത്തെ ആഗ്രഹമെന്താണെന്നു ജയിൽ അധികൃതർ ചോദിച്ചു...

"ചപ്പാത്തിയും മീൻകറിയും.."
അതായിരുന്നു മരിയയുടെ മറുപടി...!

ജയിൽ അധികൃതർ കൊടുത്ത ചപ്പാത്തിയും മീൻകറിയും പകുതി കഴിച്ചശേഷം ബാക്കി പൊതിഞ്ഞു കെട്ടി മരിയ തിരിച്ചുകൊടുത്തു.

"എന്റെ മകൻ ജയിലിനു പുറത്തുണ്ട്. ഇതവന് കൊടുക്കണം. ഇത്രയും സ്വാദുള്ള ഭക്ഷണം അവൻ ഇതുവരെ കഴിച്ചിട്ടുണ്ടാവില്ല..."

അതാണ് ദാരിദ്ര്യം...!
കുഞ്ഞുങ്ങൾ ഭക്ഷണ കുറവ് മൂലം മരിച്ചു പോകുന്നതാണ് ദാരിദ്ര്യം..!

നിങ്ങളുടെ ഭാര്യയും അമ്മയും ജീവിതഭാരം മൂലം പൊടുന്നനെ വാർദ്ധക്യത്തിന്റെ പിടിയിൽ
അകപ്പെടുന്നതാണ് ദാരിദ്ര്യം..!

അഹങ്കാരിയായ ഉദ്യോഗസ്ഥനെതിരെ
നിരായുധനായി നിൽക്കേണ്ടി വരുന്നതാണ്
ദാരിദ്ര്യം..!

നീതിയുടെ വാതിലിനു മുന്നിൽ മണിക്കൂറോളം നിൽക്കേണ്ടി വന്നശേഷം പ്രവേശനം ലഭിക്കാതെ പോകുന്നതാണ് ദാരിദ്ര്യം..!

ദാരിദ്ര്യം പട്ടിണിയും നിരാശയും ദുഃഖവുമാണ്.
അതിൽ സുന്ദരമായി ഒന്നുമില്ല..